Matthew 25

Wi emeria ten kuisow nain arekin opora-ke

1Ne Yeesus kiiriw feenap wia maakek, “Mua Maneka pika kemena wiar ekowa nain feenap saarik. Mua oko emeria aawowa owow oko ikiwok. Ne emeria nain ona tuuk ten kuisow arua kui-kuisow isimap mua nain miira puukowa ikiwemik. 2Wi emeria ikur kema pukowa ne ikur naapiw kema pukowa marewa. 3Wi emeria kema onaiya nain arua eka osena onaiya aawep feekiya iwamik. 4Ne wi emeria kema marewa nain weetak, eka osena-ko me aawemik. 5Wi ikiwem-ikok me miirowamik. Ne era-pa nan arewap ikok ikok mokoka-ke wiar awaweya inemik. 6Inep ikok uur gone-pa feenap fariwkin miimamik, ‘Mua nain fanek oo! Ni iwap era-pa aaweka oo.’ 7Ne emeria teeria nain iikirami arua saliwamik. 8Ne wi kema marewa nain-ke wi papako wia maakemik, ‘I arua eka yiar weeserek noma, ni eka lawiliw-ko yia asipeka.’ 9Naeya wi papako nain-ke wia maakemik, ‘Weetak, i niiyen-na yiena me yiar pepek erinon. Ni ikiwep niena-ko sesenareka.’ 10Aria wi ikiwep ikaiwkin mua nain ekapok. Ne wiam ikur nan arewap ikemik nain o aawep ekapemi koor kemena ikiwiwkin omopora upemik. 11Ne aria emeria wiam ikur muraremik nain urupemi omopora anumami maemik, ‘Maneka oo, omopora yia teekoma oo,’ naap maakemik. 12Ne wia maakek, ‘Weetak akena, yo-ko me nia amisarem,’ naap wia maakek.” 13Arekin opora nain wia maakep weesereya feenap wia maakek, “Naapeya ni kema wuepap maa urufami ikeka. Moram, yo kiiriw ekapowa nain ni ama ne fofa me efar amisareman.”

Yeesus uuwow mua eliwa ne samora wia maek

(Luk 19.11-27)

14Yeesus kiiriw maek, “Mua Maneka pika kemena-pa ikowa nain feenap saarik. Iir oko mua oko owow epasia ikiwekam naep ona uuwow mua wia farek. Ekapiwkin maamuma wi wapena-pa wiar wuak. 15Mua oko maamuma tausen ikur, oko tausen erup ne oko tausen kuisow, naap wiep-puap ikiwok. Mua kui-kuisow uuwow sira wiar amisarep naap wiek. 16Aria uuwow mua maamuma tausen ikur iwok nain ewur akena ikiwep maamuma nain aawep mauwowa onak. Uuwami ewar maamuma tausen ikur naapiw imenak. 17Ne mua oko maamuma tausen erup iwok nain pun naap, ikiwep uuwami tausen erup naapiw imenak. 18Ne aria mua oko maamuma tausen kuisow iwok nain-ke ikiwemi miiwa kuap maamuma nain soopak. 19Wiena saria nain mokom unowa ikiweya kirep ekapemi maamuma wiek nain wiar amisarekam naep wia farek. Ne wi ekapemik. 20Mua maamuma tausen ikur iwok nain-ke ekap ewar maamuma nain ofakowami maakek, ‘Saria, no maamuma yien nain yo ikiwemi mauwap ewar maamuma tausen ikur naapiw imenam.’ 21Naeya ona saria-ke maakek, ‘Se-ek eliw oram, no yena uuwow mua eliwa-ke, maamuma manek marewa nain aawep mauwowa baliwep faen. Naapeya woos mua nefa wuamkun no uuwow maneka urufam-ikainan. No epeya yena ikos ikok palanow manekiw ikaiyen.’ 22Ne mua maamuma tausen erup iwok nain pun epami maakek, ‘Saria, no ikiwemi maamuma yien nain aakisa urufe, maamuma fainiw uuwami tausen erup naapiw imenam!’ 23Naeya saria-ke maakek, ‘Eliw oram, no mauwow mua eliwa-ke. No maa manek marewa nain aawep mauwowa baliwep faen. Naapeya nos pun woos mua nefa wuinen. No epeya yena ikos ikok palanow manekiw ikaiyen.’

24Aria naap ikok mua maamuma tausen kuisow iwok nain-ke ekapemi maek, ‘Saria, yo sira nefar amisarem, no mua kekanowa ne mua riirinowa-ke. No anane wi mua oko manina-pa maa enowa wiar aawin, ne wi mua oko manina-pa maa isakemik nain wiar ifemakep aawin. 25Naapeya oko maamuma nefar mesaliminen naep keker opap maamuma yien nain ikip miiwa-pa soopap-puam. No urufe! Nena maamuma fanek.’ 26Naeya ona saria-ke maakek, ‘No uuwow mua samora-ke ne pun lebuma-ke. Yo mua oko manina-pa maa enowa wiar aawiyem nain, ne maa wiar ifemakiyem nain no amisar-afurap yo efa maen-i? 27Naap nain moram maamuma nain maamuma koora-pa me wuomen? Naeya yena ekapemi ewar maamuma onaiya aawekam. 28Aria ni maamuma nain wiar aaweka. Aawep mua oko maamuma tausen ten kuisow onaiya ikua nain iweka. 29Moram sira feenap ikua, wi mua maa unowa wiar ikua nain aawep uuwimik nain ikoka maa unowa akena wiinen. Naeya wi maa kerew akena wiar ikainon. Ne wi mua maa unowa marewa uuwow marew wuap-puimik nain iiwawun wiar iirarinen. 30Aria ni uuwow mua samora fain epa kokoma-pa wafuriwkin neeke ikok omemi enek muuna geegenem-ikainok.’”

Mua Muuka-ke ikoka mua wia mekawinon

31Aria Yeesus nainiw maek, feenap, “Iir nain Mua Muuka unum maneka ne mia pariniya ekapinon ne ona ensel unowa pun o warikap ekapikuan. Ekapemi owow saria maneka pokow epa-pa pokeya 32miiw unowa emeria mua ekapep miir onoma-pa wiam fiirimiwkin wia mekawap teeria erup wia wuinon. Sipsip nepiow mua sipsip meme onaiya ikaiwkin wia mekawiya naap wia mekawinon. 33Wi mua eliwa nain ona aken ekeria-pa wia wuinon ne wi samora nain asow ekeria-pa wia wuinon. 34Naeya aken ekeria-pa wiar ikemik nain wia maakinon, ‘Ni ekapeka, yena Auwa-ke kema eliwa niek, yena muuka nia naep epa iiriw ona pika kemena-pa nia wuap-puomak nain pepek erowaweka. Epa eena iiriw miiwa onami nia wuap-puomak nain. 35Moram yo iiriw wuailem-ikemkun maa enakeman, kema enekaremkun eka enakeman. Ne yo owowa oko niar ikiwemkun efa aawep baliwep efa wuaman. 36Ne yo saporma ikemkun konima yeeman, napumarep e koora ekap ikemkun efa karuem-ikeman.’ 37Naap wia maakeya wi sira eliwa ookam-ikemik nain-ke nokaremik, ‘Maneka, iir kain no wuailem-ikaeya maa enowa nenakemik ne kema enekareya eka nenakemik? 38Ne epa kain no owowa yiar ikiwep fuuneya nefa aawep baliwep nefa wuamik? Ne saporma ikaeya konima niemik? 39Ne iir kain napumarem-ikaeya e koora ekap ikaeya nefa karuem-ikemik?’ 40Naap nokariwkin os-ke wia maakinon, ‘Yo feenap nia maakinen, makena, ni sira kamenap onami yena teeria mua oko maa marewa nain wia asipaman nain, yo efa asipaman nia naiyem.’

41Naap wia maakep weesereya kirep wi teeria asow ekeria-pa ikemik nain wia maakinon, ‘Ni unowa fain eenap ekeka, Mua Maneka-ke sirirowa niinon! Ni ekap mukuna anane ikaiya neeke ikowen. Epa eena ona Mua Maneka Satan ne wi ensel samora wia wuap-puomak nain. 42Yo iiriw wuailemkun maa-ko me enakeman ne eka naemkun me enakeman. 43Ne yo owow oko-pa niar ikiwemkun me efa aawep pokomowaman ne saporma ikemkun konima-ko me yeeman. Yo napumarep e koora ekap ikemkun me efa karuem-ikeman.’ 44Naap wia maakep wia iirareya nokarikuan, ‘Maneka, i iir kain-pa no wuailem-ikaeya, kema enekarem naeya, aria owowa yiar ikiweya, saporma ikaeya, napumarep ikaeya ne koora ekap ikaeya no sira eliwa naap-ko me nefa onamik?’ 45Naap nokariwkin wia maakinon, ‘Sira fain, wi mua oko maa marewa nain me wia asipam-ikeman nain yos pun me efa asipaman nia naiyem,’ naap wia maakek. 46Naapeya wi teeria nain ikoka epa samora wia sesekeya wi sirirowa anane naap aawem-ikaikuan. Ne wi teeria sira eliwa ookam-ikemik nain owowa anane eliw ikowa neeke ikiwikuan.”